ആമിയുടെ നീര്‍മാതളപ്പൂവുകള്‍ നീ

എനിക്കു സമ്മാനിക്കണം.

നമ്മുടെതായ ഭാഷകളില്‍ നമുക്കു

പ്രണയം കൈമാറാം.

പ്രായത്തിന്‍റെ  അളവുകോലാല്‍

പ്രണയത്തിനു പരിതികള്‍ നിശ്ചയിക്കുന്നവര്‍ക്ക് മുന്നില്‍

ചുണ്ടുകള്‍കോര്‍ത്തുകൊണ്ടു നമുക്കു പ്രണയിക്കാം.

പൂക്കാത്ത പാലകളിന്‍

ചുവട്ടില്‍നിന്നുകൊണ്ട് നമുക്കു പ്രണയം പങ്കിടാം .

നമ്മുടെ ഭോഗനിശ്വാസങ്ങളുടെ ചൂടുപറ്റി

മോക്ഷമറ്റ പാലപൂവുകള്‍

ആദ്യമായൊന്നു പൂക്കട്ടെ. 

നിദ്ര തീണ്ടാത്ത എന്‍റെ കണ്ണുകളില്‍

നിനക്ക് നിന്‍റെ ചുണ്ടുകളെ ഒളിപ്പിക്കാം.

ഉന്മാദം ഒരു രാജ്യമായി പ്രഖ്യാപിച്ച് നമുക്കതിന്‍റെ , 

നിയോണ്‍ വെളിച്ചം അതിരു പങ്കിടാന്‍

വരാത്ത ഇടനാഴികളിന്‍ മറയില്‍നിന്നുകൊണ്ട്

പ്രണയത്തെ ഭോഗിക്കാം.

രാത്രികള്‍ അവസാനിക്കാത്തിടത്തു

വെളിച്ചത്തെ ഭയക്കാതെ സഞ്ചരിക്കാം.

ഇടുങ്ങിയ ചുവരുകള്‍ക്കുള്ളില്‍

ശൈത്യം എല്ലു തുളയ്ക്കുമ്പോളും

പരസ്പരം കണ്ണുകളില്‍മാത്രം നോക്കിയിരിക്കാം,

ഒരു വിരലിനാല്‍ പോലും സ്പര്‍ശിക്കാതെ.